అమరావతికి నిధుల్లేవ్!

అమరావతికి నిధుల్లేవ్!
06-02-2020 03:40:11

విశాఖకైతే అన్ని అర్హతలూ ఉన్నాయి
పది వేల కోట్లు ఖర్చుపెడితే చాలు..
పదేళ్లలో హైదరాబాద్‌తో పోటీపడొచ్చు: సీఎం
అక్కడ నికరంగా ఉంది 5,200 ఎకరాలే
ఐదేళ్లలో బాబు ఖర్చుపెట్టింది 5,677 కోట్లే
మాపై 2,300 కోట్లు భారం వేసిపోయారు
కనీస వసతులకు 1.06 లక్షల కోట్లు కావాలి
అక్కడెంత ఖర్చుపెట్టినా సముద్రంలో నీటిబొట్టే
అమరావతి, ఫిబ్రవరి 5 (ఆంధ్రజ్యోతి): అమరావతిలో పెట్టుబడులు పెట్టేందుకు ప్రభుత్వం వద్ద నిధులు లేవని ముఖ్యమంత్రి వైఎస్‌ జగన్మోహన్‌రెడ్డి స్పష్టం చేశారు. ఇక్కడ ఐదేళ్లు ఉన్నా పరిస్థితి మారదని.. అలాంటప్పుడు ఏం చేయాలని నిలదీశారు. బుధవారం విజయవాడలో జరిగిన ఓ ప్రైవేటు కార్యక్రమానికి ఆయన ముఖ్య అతిథిగా హాజరయ్యారు. ఈ సందర్భంగా అమరావతి, మూడు రాజధానులు, తన ప్రభుత్వ పథకాల గురించి వివరించారు. ‘లక్ష కోట్లు పెట్టుబడి పెడితే 20 ఏళ్ల తర్వాత తడిసి మోపెడై రూ.3లక్షల కోట్లవుతాయి.

అమరావతిలో ల్యాండ్‌బ్యాంకింగ్‌ చాలా ఉందని చంద్రబాబు చెబుతున్నారు. ఎస్జీటీ నిబంధనల ప్రకారం పరిధి మినహాయిస్తే, నికరంగా ఉన్న భూమి 5,200 ఎకరాలు మాత్రమే. ఈ భూమి ద్వారా లక్ష కోట్లు రావాలంటే.. అదే 20ఏళ్ల తర్వాత 3-4లక్షల కోట్లు కావాలంటే ఎకరం దాదాపు రూ.90కోట్లకు అమ్మాలి. ఇది సాధ్యమేనా’ అని ప్రశ్నించారు. రాష్ట్రానికి ఒక తండ్రిగా తనవంతుగా శాయశక్తులా న్యాయం చేస్తున్నానన్నారు. అమరావతి రాజధాని కోసం 53వేల ఎకరాలు ల్యాండ్‌ పూలింగ్‌లో సేకరించారని, అక్కడ కనీస మౌలిక సదుపాయాలూ లేవన్నారు. రోడ్లు, డ్రెయిన్లు, విద్యుత్‌, నీరు వంటి కనీస సదుపాయాలు కల్పించాలంటే.. గత ప్రభుత్వ నివేదికల ప్రకారం ఎకరాకూ రూ.2 కోట్లు ఖర్చవుతాయని.. 53వేల ఎకరాలకు రూ.1.09 లక్షల కోట్లు ఖర్చవుతాయని తెలిపారు. గత ప్రభుత్వం గడచిన ఐదేళ్లలో రూ.5,677 కోట్లు మాత్రమే వ్యయం చేసిందని.. ఇంకా తమ ప్రభుత్వంపై సుమారు రూ.2,300 కోట్లు భారం వేసి చంద్రబాబు వెళ్లిపోయారన్నారు.

చేసిన పనులకు కూడా 10.32శాతం వడ్డీతో అప్పుతెచ్చారని.. కేంద్రం 1,500కోట్లు ఇచ్చిందని.. అందుకే ఇక్కడ పెట్టుబడి కోసం తప్పనిసరిగా రుణాలకు వెళ్లాల్సిందేనని జగన్‌ చెప్పారు. ఈ పరిస్థితుల్లో ఏ ముఖ్యమంత్రి అయినా ఏం చేస్తారని ప్రశ్నించారు. మూడు రాజధానులపై నిర్ణయం తీసుకోకుంటే వచ్చే తరాలకు అన్యాయం, నష్టం జరుగుతాయన్నారు. ‘అమరావతి.. విజయవాడకు గానీ, గుంటూరుకు గానీ దగ్గరగా లేదు. అక్కడకు కనీసం డబుల్‌రోడ్‌ లేదు. అంతా సింగిల్‌ రోడ్డే. అయినా ఆయన(చంద్రబాబు)కు ఆ ప్రాంతం పై ఎందుకంత ఆసక్తిఅంటే.. అందరికీ తెలుసు. ఆయనకు, ఆయన అనుయాయులకు అక్కడ ఎన్నో భూములున్నాయి’ అని ఆరోపించారు. అమరావతిలో కనీస సదుపాయాల కోసం ఇంకా 1.06 లక్షల కోట్లు కావాలని.. కానీ ఆరు వేల రూపాయల కోట్లకు మించి ఖర్చు చేసే పరిస్థితి లేదని జగన్‌ స్పష్టం చేశారు. కాబట్టి ప్రజలు ఒక్కసారి ఆలోచించాలని కోరారు. ఆ వ్యయమంతా సముద్రంలో నీటి బొట్టు మాదిరిగా ఉంటుందన్నారు.

విశాఖపై పదో వంతు పెడితే..
విశాఖ రాష్ట్రంలో నంబర్‌ వన్‌ నగరమని.. అక్కడ రోడ్లు, నీరు, విద్యుత్‌ సహా అన్ని సదుపాయాలూ ఉన్నాయని జగన్‌ చెప్పారు. అమరావతిలో ఖర్చు చేయాల్సిన రూ.లక్ష కోట్లలో కనీసం పదో వంతు అంటే పది వేల కోట్లు విశాఖలో ఖర్చు చేస్తే.. పదేళ్లలో హైదరాబాద్‌తో పోటీ పడవచ్చన్నారు. ఉద్యోగాల కోసం పిల్లలు ఎక్కడకూ వెళ్లాల్సిన అవసరం రాదని చెప్పారు. అమరావతి లెజిస్లేటివ్‌ రాజధానిగా ఉంటుందని.. ఏడాదిలో 60 నుంచి 70రోజులు అసెంబ్లీ సమావేశాలు జరుగుతాయన్నారు. అమరావతి క్రమంగా అభివృద్ధి చెందుతుందని జగన్‌ చెప్పారు.

ఇకపై డిగ్రీ నాలుగేళ్లు..
తమ విద్యావిధానంపైనా జగన్‌ మాట్లాడారు. ఇంటర్‌ తర్వాత చేరుతున్న వారికి గ్రాస్‌ ఎన్‌రోల్‌మెంట్‌ రేషియో చాలా దారుణంగా ఉందని చెప్పారు. ఇకపై డిగ్రీ నాలుగేళ్లు.. ఇంజనీరింగ్‌ విద్య ఐదేళ్లు ఉంటుందని.. చివరి ఏడాది ఇంటర్న్‌షిప్‌ ఉంటుందన్నారు. విద్యారంగంలో నాడూ నేడూ, మధ్యాహ్నం భోజన పథకం, అమ్మఒడి, విద్యా దీవెన పథకాలను అమలు చేస్తున్నామన్నారు. కొత్త పాఠ్య ప్రణాళికలను అమలు చేస్తామని చెప్పారు. ‘నాణ్యమైన విద్య పిల్లలకు మనమిచ్చే ఒక ఆస్తి. దానివల్ల దారిద్య్రం పోతుంది. పేద కుటుంబాలు కూడా ఎంతో వృద్ధిలోకి వస్తాయి’ అని తెలిపారు. పెరిగిన సాంకేతిక పరిజ్ఞానంతో సెల్‌ఫోన్లు, ఐప్యాడ్లు, కంప్యూటర్లు వచ్చాయని.. వాటన్నిటిలో ఆంగ్ల భాషనే వాడుతున్నామని అన్నారు. కాబట్టి ఇంగ్లిష్‌ ఒక లగ్జరీ కాదు.. అవసరం. మంచి ఉద్యోగం కావాలంటే ఇంగ్లి్‌షలో ప్రావీణ్యం తప్పనిసరి. ఒక కుటుంబానికి తండ్రి పెద్దయితే.. రాష్ట్రానికి సీఎం తండ్రిలాంటివాడు. ఒక తండ్రిగా నేను నా పిల్లలను ఆంగ్ల మాధ్యమం స్కూలుకే పంపిస్తాను. పేద కుటుంబాల పిల్లలు ఇంగ్లిష్‌ మీడియంలో ఎందుకు చదువుకోకూడదు’ అని ప్రశ్నించారు.